يوم ما كبر الوليد

في يوم كنت ماشي وسط الطريق

لا عملت بدعة ولا قدمت شئ جديد

***

فجأة اكتشفت إنى وسط الغباء غريق

وانى كنت قافل عينى من زمن بباب حديد

***

لما اتعثرت فجأة ف فكر جرئ

كلف خاطره التعب علشان يقولى

فوق يا وليد

***

قاللي خلاص البراءة ماتت

ومات الأطفال والمواليد

***

قاللي خلاص اندفن

حلم الأمل من زمن

يظهر عليك كنت عايش شريد

***

قاللي اندفن حي الأمل وردموا

عليه الهرم وجبل المقطم

وصبوا عليه أطنان حديد

***

قاللي خلاص، اكبر وفوق

دور وشوف

يمكن تلاقي طفل برئ

مفيش ف عنيه أى خوف

***

أو بنت شاردة بتحلم ببكرة

يوم ما تضم وليدها بايدين الأمل

وتقول له عيش أحلى حياة

أجمل ظروف

***

ويمكن تشوف

الأمل في عينين شاب عمره

ما انجرح ولا اتخدش قلبه بظلم

ولا بنى لروحه جدران من الخوف

***

يمكن ويمكن ويمكن

لكن أنا ما عدت شايف

غير الضباب والعتمة

والألم مرصوصة ف صفوف

***

قاللي كتير ومعرفتش عليه أرد

قاللي آسف ظلمتك بعتمة كلامى

لكنى كنت فاكر إن توعيتك

عليّّ فرض

***

كننت عايش أنت زى الوليد

في مهده

والبلد معدش فيها مكان

لبرئ

معدش فيها غير إن

تضمهم الأرض