من كام يوم كده قررت احترم نفسي بقى واحس انى طالبة طب بجد و قررت انزل المستشفى اتعامل مع حالات حقيقيه بعيد شويه عن الحالات المحترفة اللى ف الكلية
بجد التجربة جميله جدا ندمت اليوم كتير انى مرحتش من زمان وحاسة انى ضيعت كتير ف التردد انى اعمل الخطوة دي
بس بجد احلى حاجة انك تلاقى الدكاترة الكبار مهتمين انهم يفهموك الحالات ويعرفوك ايه المهم بالنسبة لك كاندر جراديويت
غير كده بجد كتير كسرت الرهبه اللى جوايا من التعامل مع المرضى او مع الناس واحساسك بالمسئوليه من الوضع والموقف اللى انت فيه
المشكلة بتبقى اكتر ف دكاترة الامتياز والنواب يمكن مش كلهم يببقى عندهم نفس الاهتمام انهم يتعاملوا معاك او يفهموك
بس اللى لاحظته بجد ان اكتر الدكاترة اللى تعاملهم معانا احنا بيبقى بالقطارة وبنطلع منهم الكلام بالعافيه هم خريجى المنصورة
تعاملهم بجد غتت ومستفز وكرهنى شويه انى اقف معاهم بس بصراحه بقيت باطنش اسلوبهم واغتت ف الاسئله لما اوصل لاجابة
نفسي اعرف بجد ايه اللى يفرق طلبة كليه عن التانيه لما ييجوا يتعاملوا مع زمايلهم او مع الناس
ده احنا طلبة القاهرة على راي واحدة زميلتى الواحد فينا مبيصدق يبقى عارف معلومه بيبقى عاوز يقف على جبل ويذيعها
يا طلبة المنصورة احنا زيكم بالضبط ولينا حق ف نفس الاحترام ومع احترامى لنظام كل كلية نظام الدراسة عندكم بقى اسهل كتير مننا و احسن بالذات في التلات سنين الكلينيكال اللى احنا بجد بننطحن فيهم وبناخد معلوماتنا فيهم بالدروس والمجهود الذاتى علشان نظامنا بيدي وقت ضيق اوى للدراسة ف الكلية
وف الاول والاخر لنا الله كلنا